بتريد اللطام ؟؟؟؟

بتريد اللطام
وهذه الأبيات كتبتها الشاعره رقيه أخت ود حبوبه حيث صوّرت لنا فيها فراسة البطل عبدالقادر ود حبوبه ومشهد المحكمه والاعدام ومن ثم مشهد القبر حيث دفن بقرية (مصطفى قرشي ) وهي من قرى منطقة الحلاويين .

بتريد اللطام

بتريد اللطام أسد الكداد الزام
هزيت البلد من اليمن للشام
سيفك للفقر قلاّم

*****

ديّم فى التقر أنصارو منزربين
بالصفا واليقين حقيقة أنصار دين
بالحرب أم طبائق قابلو المرتيين
فى وش المكن رقدوا التقول نايمين

*****

ديّم فى التقر أنصارو زاربنو
بعهدوا القبيل بي عيسى تاهمنو
إتلموا العمد ليهم نقر سنو
الهوج والشرق طار المنام منو

*****

ديّم فى التقر قال العمير للسوم
القوي والضعيف من عينو طار النوم
الكفرة النجوس ما بختوا من اللوم
حجرت الدرب خليت جمالهم تحوم

*****

الأسد النتر وقال الدين منصور
لمولو الأورط جابوهم بالبابور
العمد الكبار كلامهم بقى مدحور
كم فقشت مدير وكرمت بالمأمور

*****

الأسد النتر بي جيهة الأبقار
لمولو الأورط شايلين سلاح النار
ود حبوبه قام ورتّب الأنصار
فى متفيه ديك كم شبعن صقّار

*****

الإعلان صدر واتلمت المخلوق
بي عيني بشوف أب رسوه طامح فوق
كان جات بالمراد واليمين مطلوق
ما كان بتشنق ود أب كريق فى السوق

*****

الإعلان صدر وإتلمت الحلال
نصبولوا السلاح وإتكرنف الخيال
قدر الله الحصل والزمن ميّال
منسول من أبوك ماك ودحرام دجّال

*****

بتكلم بقول بوريك شّن حسبو
نايبو السنين منّو الرجال حسبو
كل الخاصموك فى الآخره ما كسبو
التبعوك جنود لله ما انتسبو

*****

رضوان الإله تملأ الضريح كافور
مسك الرحمه لاح منو يلوح النور
أغفر سيئات كل من يجيك يزور
فى الفردوس هناك يتمنى مهما يدور

قصيدة حماسية .يوجد تصحيح
في كتفيه وليس منقية وكتفية قرية بالقرب من الولي الحلاويين
اجاد وابدع فيها الفنان المرحوم بادي محمد الطيب ابن حلة عباس محلية المعليق

أبــــــــــيـــات قــــــــــــــــــــــويـــــة وحـــمــاســــــــــــــــــــــــــيــة تــخـــلـــى الــواحــــد يــــقــــيــــف للــقـــص وهــــو مــطــــــــــروح الجــبـــين وراســــــخ كـالجـــــبل الأشـــــــــــــم - ومــحــكـــمـــــــــة الاِعـــــــــــــــــدام كـــانـــــــت فــــى الـكـــامـــلــيـــن - ونـســــــــــــــــــــوان زمــــــــــــــــان كـــان لــديـــهـــم الـفـــطـــانــــه والدهــــــاء مــــرأ مــــن نـســـــــوان زمــــــــــان تــســــــــــاوي 100 راجــــل فـــى هــــذا الـزمــــــــــــــــــن