ابو الشهيق

عمنا علي ربنا يعطيه العافية .اتذكر له مقلب عملو ا معاي وانا كنت صغير في الابتدائي .الوالده متعها المولي بالعافية ارسلتي ذات صباح شتوي الي دكان عمي علي لشراء شاي حب نصف وقية ولا وقية .وكانت عندنا باقي كربو من العشاء بايتة ولما تصبح تصبح حاجة تانية واسالو صاحبي بابكر بدر الكربو كيف مع شاي الصباح!! المهم لقيت عم علي يشرب في الشاي وقبل ما اديهو القروش مسكني ابو الشهيق وقبل ما يديني الشاي قال لي انت سرقت حبل الحمار حقنا مالك!! وحلفت له اني ماسرقتو وهو مصر انو انا سرقتو فبكيت وخليت الشاي ومشيت للحاجة وقلت لها عم قال سرقت حبل حمارهم وجاءت معاي جاهزة للشكل ولما شافا عم ضحك كثيرا وانا استغربت ليه بيضحك .فقال لها هو ماسرق لكن كان عندو ابو الشهيق عندما قال لي اديني شاي !!!!
وحتي الان لم اعرف علاقة ابو الشهيق بالسرقة . يمكن يقولوا الحرامي راسو ريشةويتم ضبطة عندما يحاول لمس راسة اما ابو الشهيق افتووووووووونا.
وربنا يدي العافية لعم علي

الاخ شوقى سلام من الله عليك وعلى الجميع وخاصة العم على حمودة والوالدة العظيمة التى ازكرها مرارا وتكرارا نعم لقد كانت خير معين لنا صبحا وتحت ذاهبون الى المدرسة وكم كانت لنا جلسة بحضرة الكربو والشاى والناس ماعارفة وشايلة محمد خير ملك الكربو ومعه عثمان عوض الله ومن هنا ارسل تحياتى الحارة للاخ عثمات ومن قبله للعانس محمد خير اسآل الله ات يغك عنوسته التى امتدت طويلا وزى ماقال عمنا حسن موسى امد الله فى ايامه (محمد خير دا لازم تلهموا ..........قبل الزواج) واللبيب بالاشارة يفهم ,, اخى شوقى تعلم كل العلم مدى حبى لك وللاسرة الكريمة خاصة الوالدة وكما قلت سابقا ربنا يمد فى ايامها ورقم ذلك لااخفى منك زعلى الشديد والشديد جدا وانت تعرف السبب ورقم ذلك الف الف الف الف الف الف الف الف الف الف ومليون مبروك وبيت مال وعيال وكنت امنى نفسى ولكن ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ فى الختام لك منى الف الف تحية والسلا ختام اخوك دوما وابدا بابكر بدر سومى

الاخ شوقى فاتنى ان اعرفك علاقة ابوالشهيق بالسرقة يقولون عندما يهاجمك بالسرقة وانت لست بسلرق تصاب بالدهشة والاستقراب فعندها يزهب منك ابو الشخيق